12 خطوة لتعلم اللغة الانجليزية بكل سهولة ويسر وفى اسرع وقت
الخطوة الاولى:
استمع ثم استمع ثم استمع الى الحوارات والمناقشات والمحادثات بلأنجليزى وحاول بقدر الامكان انك تسمع لمحادثات بسيطة ومفهومة بنسبة كبيرة ليك. حاجة زى مثلا قصص الاطفال او محادثات بسيطة وخطوة خطوة اسمع لحاجات متقدمة بس المهم لازم تقدر انك تفهمها يعنى متروحش تسمع ال BBC .
الخطوة الثانىة:
اوعى تترجم اللى عايز تقولوا من العربي للأنجليزي، لكن احفظ العبارات زى ما هيا زى اسمك, واستخدمها للتعبير عن اى حاجة انتا عايزها وكررها على قد ماتقدر , الموضوع دة هيسهلك عملية الطلاقة فى اللغة كتير اوى ومش هتخليك تقف كتير فى الكلام.
الخطوة الثالثة:
اوعى اوعى اوعى تخجل انك تتكلم انجليزي حتى لو كان كل اللى بتقولوا فية اخطاء ,صدقنى مع الاستمرار والمحاولة هتنجح يعنى هتنجح, اكررها تانى اوعى تتكسف انك تتكلم.
الخطوة الرابعة:
حاول تتعلم مخارج الاصوات الخاصة باللغة الانجليزية والطريقة الصحيحة لنطقها وخاصة حرف (p&B) وكمان ال R ودة هيساعدك انك تتكلم انجليزي بشكل سليم ومفهوم , علشان مخارج الاصوات مختلفة عن العربى شوية .
الخطوة الخامسة:
انك تتعلم Grammar دة هيساعدك وهينور طريقك وهيخليك تتكلم انجليزي بشكل سليم وصحيح.وفكرة انك تتعلم المبادىء الاساسية الخاصة ببناء الجملة دة هيفيدك جدا خاصة فى الجانب الاكاديمى , علشان طبعا فية فرق بين اللغة العامية والاكاديمية .
الخطوة السادسة:
حط جدول لنفسك ويكون جزء منو انك تحفظ خمس كلمات يومياً “قراءة وكتابة” وطبعا احفظ الكلمة فى جملة ودة هيولدلك مجموعة كبيرة من الكلمات والجمل بعد فترة، ولازم تعرف نقطيتن مهمين اوى وانتا بتحفظ الكلمات
1 – كيفية استعمال الكلمة ؟
2 – ثانيا المعنى الثانى للكلمة ؟
الخطوة السابعة:
الانجليزي مش مجرد حفظ كلمات بس فية حاجات تانية لازم تهتم بيها زى المصطلحات(Idioms) وهنا انا بقول كلام وبقصد بية كلام تانى زى فى العربى كمثال (انتا قلبك مات) هنا انا قولت كلام لكن المعنى اللى اقصدة مختلف تمام عن الكلام نفسة ، نفس الوضع فى الانجليزي .
الخطوة الثامنة:
خلى عملية تعلم اللغة هواية محببة لقلبك ومش حاجة مفروضة عليك بالعافية وصدقنى انك تحب الحاجة اللى بتعملها هيسهل عليك اوى وهيقصر الطريق كمان فحاول على قد ما تقدر انك تخلط المتعة بالتعلم زى انك تتعلم من الافلام والمسلسلات .
الخطوة التاسعة:
اوعى فى يوم من الأيام تقول انا بقيت جامد اوى اوى فى الانجليزي وتتنفض عن انك تتعلم اى جديد فية , انصحك انك تبقى فى تعلم مستمر , وحاول تتعمق فى اللغة كل ما يجيلك الفرصة علشان الانجليزي دة بحر .
الخطوة العاشرة:
اختبر نفسك بشكل دوري وصحح اخطائك على قد ماتقدر علشان تعلم اللغة حاجة وانك تبقى محترف دى حاجة تانية, فى البداية انت بتتعلم وبتتكلم بشكل عفوى وبتقول اى كلام فى خيالك لكن مش دة هدفنا ،هدفنا انك تبقى حد محترف.
الخطوة الحادية عشر:
الثقة بالنفس اساس تعلم اللغة وكل ماكانت ثقتك بنفسك عالية كل ما رغبتك فى استخدام اللغة زادت ودة عكس اللى انتا بتعملو دلوقتى وهوة انك خايف تتكلم لحسن تغلط . أغلط واتكلم ميهمكش
الخطوة الثانىة عشر:
خليك متأكد من حاجة انك كل ما غلطت أكتر كل ما اتعلمت أكتر وصدقنى كل حاجة فى البداية بتبقى صعبة دة “قاعدة كونية” لكن الاستمرار والممارسة اليومية وانك تثق بنفسك وانك تبقى مصر وملتزم صدقنى هتنجح يعنى هتنجح “اصل استحالة تتعب ومتنجحش”
